श्री देव मोरया धोंडा

शिवकालीन मोरयाचा धोंडा : वायरी भूतनाथ येथील श्री देव मोरयाचा धोंडा क्षेत्र धार्मिक पर्यटन स्थळ व त्या ठिकाणी आरमार संग्रहालय होण्यासाठी उपमुख्यमंत्री यांनी अनुकूल आदेश दिले असल्याची माहिती पर्यटन व्यावसायिक महासंघाचे जिल्हाध्यक्ष बाबा मोंडकर यांनी दिली.

तळकोकणातील सिंधुदुर्ग जिल्ह्यातील मालवण तालुक्यातील छत्रपती शिवरायांच्या ऐतिहासिक सिंधुदुर्ग किल्ल्याचे साडेतीनशे वर्षापूर्वी ज्या पावनस्थळी भूमीपूजन झाले ते स्थळ म्हणजे श्री देव मोरया धोंडा. मालवणच्या सागरी किनाऱ्यावर असलेला श्री देव मोरयाचा धोंडा क्षेत्र तळकोकणातील किनारपट्टीच्या गाबीत समाजातील असंख्य भाविकांचे श्रद्धास्थान. आपल्या महाराष्ट्रातील शासकीय पूजेचा मान असलेली दोन स्थानं म्हणजे पंढरपूरचा विठोबा आणि आपल्या सिंधुदुर्गातील श्री देव मोरयाचा धोंडा क्षेत्र. याठिकाणी वर्षभर गाबीत समाजातील असंख्य भाविक आपल्या मनातील इच्छित व्यक्त करुन आपला कार्यभाग इथे सोपवत असतात. असा हा श्री देव मोरयाचा धोंडा क्षेत्र ऐतिहासिकदृष्ट्याही छत्रपतींच्या पदस्पर्शाने पावन झालेल्या मालवणच्या किनाऱ्यावर काळाचे घाव सोसत अढळपणे उभा आहे.

हे क्षेत्र धार्मिक पर्यटन स्थळ म्हणून घोषित करून त्याठिकाणी आरमार संग्रहालय उभारण्यात यावे यासाठी उपमुख्यमंत्री यांच्याकडे पाठपुरावा करण्यात आला. या संबंधी वैद्यकीय आघाडीचे कोकण प्रभारी डॉ. अमेय देसाई यांच्या माध्यमातून लक्ष वेधले. ते गाबीत समाजाचे विद्यमान जिल्हा कार्याध्यक्ष तसेच पर्यटन व्यावसायिक महासंघाचे अध्यक्ष विष्णू (बाबा) मोंडकर आणि भारतीय जनता पक्षाचे जिल्हा सरचिटणीस व पर्यटन व्यावसायिक महासंघ जिल्हा उपाध्यक्ष प्रसन्न देसाई यांनी दोन महिन्यांपूर्वी प्रत्यक्ष मोरयाचा धोंडा या ठिकाणी भेट देत तिथे मस्तक टेकवून इथे विकासात्मक काम घडले पाहिजे असा निश्चय करत ही बाब उपमुख्यमंत्री यांचे निकटवर्तीय आमदार यांच्याकडे डॉ. देसाईंनी मांडली. त्याचे महत्त्व लक्षात घेत व खरोखरच छत्रपतींच्या या ऐतिहासिक तसेच पावन स्थळाला धार्मिक पर्यटनस्थळ म्हणून मान्यता मिळावी तसेच याठिकाणी एक शिवकालीन आरमार संग्रहालयासाठी डीपीआर मंजुर व्हावा या दोन्ही बाबींसाठी आमदार यांनी उपमुख्यमंत्री यांना पत्र लिहिले. योगायोग म्हणजे काल मॉरिशस येथे छत्रपती शिवरायांच्या पुतळ्याचे अनावरण करण्यासाठी उड्डाण करण्या अगोदर उपमुख्यमंत्री यांनी या पत्रावर अनुकूल आदेश संबंधित विभागाला दिले आहेत. यानिमित्ताने छत्रपती शिवरायांना अभिप्रेत असलेले सुशासन पर्व म्हणजे काय याचा अनुभव पुन्हा एकदा उपमुख्यमंत्री यांनी जनमानसासमोर ठेवला आहे. पर्यटन व्यावसायिक महासंघाच्या वतीने उपमुख्यमंत्री तसेच आमदार , राज्य सरकारचे व डॉ. अमेय देसाई यांचे आभार मानत असल्याचे श्री. मोंडकर यांनी सांगितले.